(Alolamedia-Dili) Reuniaun Jeral Fundasaun Alola (AGM) nian ne’ebe horisehik ( 27/8) realiza iha Salaun “Fitun” Alola hanesan loron espesiál ida ba familia Fundasaun Alola nian. Enkontru ba tinan 2019 hanesan AGM ba dala-12  no hetan partisipasaun másimu husi Presidente no membru Konselhu Ezekutiva Alola tuan no foun sira, Diretora Interina, parseiru serbisu, doador  no fungsionarios Alola sira lao ho susesu no marka etapa importante ba estrutura organizasaun.

“Enkontru Jeral Alola nian hanesan loron espesiál ida laos deit tanba tuir Lei Inan Fundasaun Alola  nian ita tenke halo duni kada tinan maibe ida ne’e hanesan oportunidade furak ida ba ita atu bele fo parabens ba malu ba susesu serbisu ne’ebe ita atinji durante tinan ida ne’e nomos halo refleksaun ba buat ne’ebe ita presiza hadia”, hateten Fundadora Alola, Kirsty Sword Gusmao  durante diskursu.

Iha reuniaun ne’e, Diretora Interina Maria Imaculada Guterres  entrega simbolikamente Relatoriu Anual  Fundasaun Alola ba tinan 2018 ba Fundadora Alola Kirsty Sword.  Hafoin simu relatorio ida ne’e,  Prezidente Konsellu Ezekutiva kontinua halo lansamentu  ba relatorio ne’e no fahe ba membru Konselhu Ezekutiva Alola nomos parseiru serbisu sira.

“Iha buat barak ne’ebe fo satisfasaun boot mai hau hanesan Fundadora nomos Prezidente Fundasaun Alola maibe buat ida ne’ebe sai orgulhu boot mai hau katak organizasaun ida ne’e bele sai hanesan kampo de formasaun ba feto maluk barak”,  esplika Fundadora Alola ne’e.

Nu’udar Fundadora nomos Prezidente ba Konsellu Ezekutiva, Kirsty Sword sente orgullhu teb-tebes ba Fundasaun Alola ne’ebe bele fo kontribuisaun boot hodi atinji Objetivu Dezenvolve Nasional balun liu-liu iha area saúde inan no kosok oan, edukasaun no partisipasaun feto iha vida polítika nasaun nian. Nia mos hateten katak  Fundasaun Alola mos hetan rekonesementu internasionál no nasionalmente, hanesan organizasaun importante no efektivu.

“Ne’e laos tanba hau mak harii, ne’e laos tanba organizasaun ida ne’e besik Maun Boot, no simu apoio husi Maun Boot Xanana, ne’e tanba imi nia dedikasaun, komitmentu, serbisu maka’as no domin ba ita nia serbisu ba feto maluk sira iha rai tomak, ba sira ne’ebe hela iha rai sidade maibe liu-liu ba sira ne’ebe vurneravel liu iha area rural sira”, hateten Kirsty Sword iha salaun Alola nian.

Fundadora ne’e mos apela ba staff Alola tomak atu kontinua rai sacrafisiu ne’ebe sira iha sira iha fuan no memoria loron loron,

“Liu husi ita nia serbisu maka’as no profesionalismu, no haka’as an atu hadia bebeik, ita nia prestasaun serbisu pessoal atu hadia ita nia organizasaun. Ita bele fo onhra ba Falintil sira nia sacrafisiu nomos ba ema kiik no brani barak sira nia terus no mate”, apela ikus husi Kirsty Sword.

Iha reuniaun ne’e, Diretora Interina Maria Imaculada Guterres  entrega simbolikamente Relatoriu Anual  Fundasaun Alola ba tinan 2018 ba Fundadora Alola Kirsty Sword.  Hafoin simu relatorio ida ne’e,  Prezidente Konsellu Ezekutiva kontinua halo lansamentu  ba relatorio ne’e no fahe ba membru Konselhu Ezekutiva Alola nomos parseiru serbisu sira.

Entertantu,  Diretora Interina Alola bainhira relata kona-ba susesu ne’ebe Alola hetan iha tinan 2018, rekoñese   mos kontribuisaun parseiru no doador nia sira.

“Susesu hirak ne’ebe Fundasaun Alola atinji iha tinan 2018, Ami mesak la bele atinji sei karik la iha apoio no fiar husi parseiru serbisu ne’ebe hakarak serbisu hamutuk ho ami hodi atinji objetivu ne’ebe ami iha”, hateten diretora ne’e.

Diretora ne’e ne’e mos espera katak ho fiar ne’ebe doador iha sei fo susesu liu-tan ba Fundasaun Alola iha futuru.

“Ami espera katak liu husi apoio doadores, parseiru ne’ebe maka durante ne’e nafatin hamutuk ho ami, ami sei bele susesu liu-tan iha futuru”, Maria Guterres hateten.

Iha biban enkontru annual  ne’e, diretora interina Fundasaun Alola mos fo agradese wain ba doadores sira, parseiru, konsellu ezekutiva Alola nian nomos inklui Alola Australia.

“Ho ida ne’e ami fiar katak hamutuk ho ita boot sira, ami sei bele lao nafatin ba oin ho susesu hodi tane no suporta feto no labarik iha  Timor-Leste  ho diak, Hamutuk Ita Bele, Feto Forte Nasaun Forte”, apela diretora ne’e.   

Durante enkontru, Fundadora Alola, Kirsty Sword Gusmao halo mos lansamentu ba plataforma foun husi website Fundasaun Alola ne’ebe  ekipa media prepara no kontinua ho divertimentu atu selebra susesu ne’ebe Fundasaun Alola hetan iha tinan 2018. (FXS)

#remata